Соња Стефановска е Директор на Баумер Македонија, дел од швајцарската семејна компанија Баумер Холдинг — глобален лидер во дизајнот и производството на врвна сензорска технологија и мерни инструменти, основана во Македонија во 2018 година. Како Извршен директор на оваа прва гринфилд инвестиција на Баумер, таа е клучна движечка сила уште од стартап фазата, обезбедувајќи стратешко насочување и практично водство во сите основни функции.
Соња поседува повеќе од 25 години релевантно искуство во дизајнирање, имплементација и управување со комплексни проекти за оптимизирање на организациската ефикасност, унапредување на пазарната позиција, раст на бизнисот и одржлив развој во различни сектори. Во текот на својата исклучително богата кариера има воспоставено стратешки и долгорочни партнерства со деловната заедница, јавниот сектор и академските институции, придонесувајќи кон јакнење на институционалните капацитети и креирање на нови развојни и деловни можности.
Во својата кариера Соња има активен придонес во повеќе институционални и советодавни тела, како Потпретседател на Советот за странски инвестиции и член на Управниот одбор на Дирекцијата за технолошки развојни зони. Како дел од долгогодишното работење во донорската заедница, Соња работеше и на развој на капацитетите на Стопанската комора за ИКТ — МАСИТ.
Таа беше и основач на најголемиот стартап тренинг центар во земјата, Сивус Едукативен и Развоен Центар, каде ги постави темелите на институцијата која стана бренд за доусовршување и профилирање на генерации млади професионалци од ИКТ секторот.
Има магистерска диплома по економија од Универзитетот Сорбона во Париз и е мајка на Марко.